नेपाली भाषा, कला र संस्कृतिलाई प्रवासमा रहेका हाम्रा भावी पुस्तामा हस्तान्तरण गरी जगेर्ना गर्न टेवा पुर्याउने ध्येयले न्युजिल्यान्डमा विभिन्न सङ्घसंस्था मार्फत नेपाली भाषाका कक्षाहरू सञ्चालन हुदै आएका छन् । तर सबैतिर प्रयोग गर्नको लागि साझा पाठ्यपुस्तकको अभाव र सहज रूपले प्राप्त नभएको हुँदा ती सङ्घसंस्थाहरूले आआफ्नै किसिमले पाठनका विषयवस्तु तय गर्दै आएका छन् । त्यसैले न्युजिल्यान्डभरि नै पाठ्यपुस्तकमा एकरूपता होस् भन्ने हेतुले नेपाली साहित्य समाज न्युजिल्यान्ड र गैर आवासीय नेपाली सङ्घ न्युजिल्यान्डले संयुक्तरूपमा यो पुस्तक तयार पारेर प्रकाशन गरेका हौं ।