नेपाली साहित्य समाज न्युजिल्यान्डले समाजका संस्थापक अध्यक्ष कवि पशुपति कर्माचार्यलाई नेसास नेपाली साहित्य सृजना सम्मान २०२२ बाट सम्मानित गरेको छ । नेपाली साहित्य समाज न्युजिल्यान्ड र गैर आवासिय नेपाली संघ न्युुजिल्यान्डको आयोजनामा १९ नोभेम्बर २०२२ का दिन न्युुजिल्यान्डको क्राइस्टचर्चमा सम्पन्न लक्ष्मी जयन्ती समारोहमा साहित्य समाजका अध्यक्ष डा वीरेन्द्र केसी तथा सल्लाहकारहरु डा भोला प्रधान र बाबुराजा महर्जनले उक्त सम्मान प्रदान गर्नु भएको थियो । कवि पशुपति कर्माचार्यका यादका आयामहरु, मुटुमा बुद्घ बोकेर, समानताको चिराग बोकेर कविता संग्रह र फूलका थुङ्गा, रुखमा बुद्घ हाइकु संग्रह गरि पाँच वटा कृतिहरु प्रकाशित छन । सम्मान पछि कार्यक्रममा बोल्दै कवि कर्माचार्यले आफुले जन्माएको संस्थाबाट सम्मानित हुन पाउँदा गर्व महशुस भएको र थप लेखनका लागि हौशला मिलेको कुरा बताउनुभएको थियो । नेपाली साहित्य समाज न्युजिल्यान्डले नेपाली साहित्य सृजनामा अविछिन्न रूपमा योगदान पु¥याउँदै आउनु भएका स्रष्टा तथा साहित्यकारलाई उहाँहरुको योगदानको कदर गर्दै हरेक बर्ष “नेसास नेपाली साहित्य सृजना सम्मान” प्रदान गर्ने गर्दछ ।
त्यस्तै साहित्य समाज न्युजिल्यान्डले नेपाली भाषा र साहित्यको प्रवर्धनमा योगदान पु¥याउँदै आउनु भएका ब्यक्ति तथा संध संस्थाहरुलाई हरेक बर्ष “नेसास नेपाली साहित्य सेवा सम्मान” प्रदान गर्ने गर्दछ । समाजले आफ्नो स्थापनाकाल देखि पु¥याउँदै आएको बिशिष्ट योगदानको कदर गर्दै यो बर्षको “नेसास नेपाली साहित्य सेवा सम्मान” गैर आवासीय नेपाली संघ न्युजिल्यान्ड, न्युजिल्यान्ड नेपाल सोसाइटी र न्युजिल्यान्ड नेपाल एसोसिएसनलाई प्रदान गरेको छ । उक्त सम्मानहरु पनि सोहि लक्ष्मी जयन्ती समारोहमा प्रदान गरिएको थियो । जस अन्र्तगत गैर आवासीय नेपाली संघ न्युजिल्यान्डका अध्यक्ष उद्घव अधिकारीलाई साहित्य समाजका अध्यक्ष डा वीरेन्द्र केसीले, न्युजिल्यान्ड नेपाल सोसाइटीलाई नेपाल न्युजिल्यान्ड फ्रेन्डसिप सोसाइटीका अध्यक्ष अशोक श्रेष्ठले र न्युजिल्यान्ड नेपाल एसोसिएसनलाई क्यान्टरवरी नेपालिज सोसाइटिका अध्यक्ष दिपक पाण्डेले सम्मान प्रदान गर्नु भएको थियो ।
डा. जया तिवारीको संयोजनमा आयोजित उक्त लक्ष्मी जयन्ती कार्यक्रम समाजका सचिव गोपाल प्रसाद कँडेलले संचालन गर्नु भएको थियो । कार्यक्रममा साठि जना नेपाली भाषा र साहित्य प्रेमी महानुभावहरुको उपस्थित थियो भने समाजका सल्लाहकारहरु डा. भुवनेश्वर ढकाल, शैलेश कर्माचार्य लगाएत बिस जना स्रष्टाहरुले रचना वाचन गर्नु भएको थियो । रचना वाचनको बिचबिचमा साना नानीहरुको नृत्य पनि समावेश गरिएको थियो ।
